ASSOCIAZION CULTURÂL MUSICÂL PERCOTO CANTA
20° BANT DI CONCORS
PAR UN ELABORÂT IN LENGHE FURLANE

La Associazion culturâl musicâl “PERCOTO CANTA” cul patrocini e la colaborazion dal Ufici Scolastic Regjonâl dal Friûl – Vignesie Julie, de ARLeF – Agjenzie Regjonâl pe Lenghe Furlane e de Societât Filologjiche Furlane, e bandìs un concors pe realizazion di un elaborât in lenghe furlane su chescj argoments:

– 2023, AN INTERNAZIONÂL DAL DIALIC TANT CHE GARANZIE DI PÂS
La Assemblee Gjenerâl des Nazions Unidis e à proclamât il 2023 an internazionâl dal dialic tant che garanzie di pâs. Educâ al dialic al vûl dî creâ une culture di pâs, costituî un mieç par mobilitâ i sfuarçs de comunitât internazionâl a promovi une gnove fiducie tra lis nazions, su la fonde di negoziâts, cooperazion e de comprension mutuâl. Popui e nazions a son invidâts a meti al centri des lôr azions la peraule “insiemi”, parcè che al è dome midiant de solidarietât e dal dialic, che si pues costruî un timp li che la pâs e la armonie a sedin presintis intes nestris vitis, intes nestris fameis e intal nestri mont. La art dal dialic e je la forme plui alte e nobile che i oms a àn a disposizion, parcè che la fuarce de peraule e je plui potente e plui prolifiche di ogni conflit. Il dialic al met in relazion, al domande la scolte di ogni vôs, la atenzion aes esigjencis di ognidun, al clame ae coresponsabilitât, ae convivence dai diviers ponts di viste e dai mûts di jessi intune comunitât che e vûl deventâ inclusive. Il dialic al pues e al à di vierzi senaris gnûfs, costruî gnovis traietoriis: e je une sfide par ognidun di nô…

– GO!2025 Nova Gorica e Gurize Capitâl Europeane de culture 2025
Il 2025 al sarà l’an dal event une vore impuartant “Go! 2025 Nova Gorica e Gurize Capitâl europeane de culture 2025”. Al è un travuart storic par une citât maraveose tant che Gurize (ma ancje par dut il popul furlan) che dal sigûr al contribuirà a valorizâ la sô vocazion pluriculturâl e la sô identitât plurilinguistiche. E je une ocasion uniche pe promozion e pal disvilup dal tiessût creatîf, pe valorizazion dal patrimoni storic, linguistic e culturâl, de competitivitât e de capacitât di atrazion di dut il teritori regjonâl. La nomine di Gurize e Nova Gorica a Capitâl de Culture e je un sucès straordenari: la vitorie de anime plui autentiche de Europe, chê de pluralitât dai popui e des lenghis, e dulà che ogni dì la int e fevele par furlan, par talian e par sloven. In dì di vuê, Gurize e forme cun Nova Gorica une aree urbane integrade ancje a nivel aministratîf; sedi pe sô posizion che pe sô storie, la citât e je un dai ponts di contat tra lis culturis romanichis, slavis e gjermanichis.

Presente lis tôs opinions, in forme di conte, poesie, teme, flabe, filastrocje, ricercje, riflessions personâls, lavôr multimediâl, e v.i. Sielç un tra i doi temis proponûts e presente lis tôs opinions, in forme di conte, poesie, teme, flabe, filastrocje, ricercje, riflessions personâls, lavôr multimediâl, e v.i.

Il bant al è regolât di chescj articui:
Art. 1) A puedin partecipâ ae assegnazion dai premis i arlêfs che tal an scolastic 2022/2023 a frecuentin lis Scuelis primariis e lis Scuelis secondariis di prin grât de Regjon Friûl – Vignesie Julie; si pues partecipâ sedi in maniere individuâl che in grup.
Par partecipâ si à di mandâ une preiscrizion, dentri di sabide ai 15 di Avrîl dal 2023. Il document al à di jessi compilât daûr dal model in zonte, che si cjate ancje li de Segretarie de Associazion “PERCOTO CANTA” e sul sît internet www.percotocanta.it.
La organizazion e domande la preiscrizion par podê previodi il numar dai partecipants e duncje par preparâsi a valutâ miôr che si pues ducj i elaborâts.

Art. 2) I elaborâts a àn di rivâ in formât digjitâl cun letare racomandade o consegnâts a man a cheste direzion:
Associazion Culturâl Musicâl “PERCOTO CANTA”
vie Gurize, 17 – PERCÛT
33050 Pavie di Udin
o, in alternative, par pueste eletroniche ae direzion info@percotocanta.it dentri di sabide ai 20 di Mai dal 2023 (al fâs fede il timbri dal ufici postâl o la date dal messaç di pueste eletroniche).
Ogni partecipant al varà di specificâ non e cognon, direzion di cjase, numar di telefon, direzion di pueste eletroniche, e il non de scuele e de classe frecuentade. Si domande ancje non, cognon, direzion e numar di telefon dal insegnant o dai insegnants responsabii dal progjet.

Art. 3) I elaborâts a saran valutâts di une jurie di cualitât nomenade de Associazion “PERCOTO CANTA”, de Societât Filologjiche Furlane, de ARLeF – Agjenzie Regjonâl pe Lenghe Furlane, dal Ufici Scolastic Regjonâl F-VJ, e selezionade tra lis personalitâts plui impuartantis de culture furlane. Il judizi de jurie no si pues discuti.

Art. 4) La comission judicante e sielzarà i trê elaborâts miôr tra ducj chei rivâts.
Il prin classificât al ricevarà: une borse di studi di € 300,00 e une selezion di libris ufierts de Societât Filologjiche Furlane.
Il secont classificât al ricevarà: une borse di studi di € 200,00 e une selezion di libris ufierts de Societât Filologjiche Furlane.
Il tierç classificât al ricevarà: une borse di studi di € 100,00 e une selezion di libris ufierts de Societât Filologjiche Furlane.
I nons dai vincidôrs a saran publicâts sul sît internet www.percotocanta.it cun lunis ai 5 di Jugn dal 2023. Cun di plui, a ducj i partecipants (o aes lôr scuelis) al sarà mandât un messaç di pueste eletroniche cul verbâl de comission judicante.

Art. 5) Se la disponibilitât economiche lu permetarà, ducj i elaborâts in concors, o une part di chescj, a saran publicâts intun e-book di pueste par cure de ARLeF – Agjenzie Regjonâl pe Lenghe Furlane, de Societât Filologjiche Furlane e de Associazion “PERCOTO CANTA”. I autôrs dai elaborâts vincidôrs si impegnin a jessi presints di persone, o a mandâ cualchidun che ju rapresenti, aes premiazions che si davuelzaran te Vile Frattina-Caiselli di Percût cualchi zornade prime de manifestazion “PERCOTO CANTA” (si comunicarà la date definitive tal moment de proclamazion dai vincidôrs).

Art. 6) Cui che al partecipe al concors al è obleât a rispietâ ad implen i articui che a regolin il concors stes. La Associazion culturâl musicâl “PERCOTO CANTA” e pues fâ cualchi piçule modificazion al regolament, ma cence tocjâ i concets di fonde. Chest bant si cjate ancje sul sît internet www.percotocanta.it
I dâts personâi furnîts dai partecipants al concors a saran cjapâts sù e tratâts dome pes finalitâts leadis al concors stes (Gdpr n. 101/18 dai 10 di Avost dal 2018, gnove informative su la privacy). Il titulâr dal tratament al è il President de Associazion culturâl musicâl “PERCOTO CANTA” cu la colaborazion dai conseîrs e dai socis de Associazion.Par altris sclariments su chest bant si pues clamâ il siôr Nevio Lestuzzi al numar 348/2260818, intal dopomisdì.