ASSOCIAZION CULTURÂL MUSICÂL PERCOTO CANTA
19° BANT DI CONCORS
PAR UN ELABORÂT IN LENGHE FURLANE

La Associazion culturâl musicâl “PERCOTO CANTA”, cul patrocini de Regjon Friûl – Vignesie Julie, dal Comun di Pavie di Udin, dal Comun di Aquilee, dal Ufici Scolastic Regjonâl dal Friûl – Vignesi Julie, e cul patrocini e cu la colaborazion de ARLeF – Agjenzie Regjonâl pe Lenghe Furlane e de Societât Filologjiche Furlane, e bandìs un concors pe realizazion di un elaborât in lenghe furlane (conte, poesie, teme, flabe, filastrocje, ricercje, riflessions personâls e v.i.) su chescj argoments:

2022 an internazionâl dal disvilup sostignibil de mont
Contâ il rapuart tra l’om e la nature al è fondamentâl par formâ intai zovins une identitât in evoluzion continue e necessarie, e al pues deventâ un strument clâf par imagjinâ gnûfs percors pal futûr de mont, che al reste dut câs leât ae capacitât dal om di preservâle e di valorizâle. Lis monts a son l’habitat di speciis unichis di flore e di faune, ecosistemis naturâi, fragjii ma tal stes timp fuarts, che devant de emergjence climatiche a puedin rapresentâ lis sentinelis che a vuardein i cambiaments in vore, ma tal stes timp a puedin jessi ancje laboratoris pe elaborazion di rispuestis virtuosis, in graciis di tradizions milenariis di convivence tra l’om e l’ambient naturâl. Cheste e je une grande oportunitât par inviâ iniziativis buinis di promovi la culture e lis tradizions locâls, in linie cu la sostignibilitât, cjalant bande disvilups positîfs pe vite intes valadis e su lis monts, incressint la cussience che il disvilup sostignibil de mont e la conservazion dai siei ecosistemis a puedin jessi di impuartance fondamentâl pal futûr de umanitât. Esprim lis tôs opinions su chescj argoments, in forme di conte, poesie, teme, flabe, filastrocje, ricercje, riflessions personâls, lavôr multimediâl, e v.i., magari cuntune atenzion particolâr pes monts dal Friûl – Vignesie Julie.

GO!2025 Nova Gorica e Gurize Capitâl Europeane de culture 2025
Il 2025 al sarà l’an dal event une vore impuartant “Go! 2025 Nova Gorica e Gurize Capitâl europeane de culture 2025”. Al è un travuart storic par une citât maraveose tant che Gurize (ma ancje par dut il popul furlan) che dal sigûr al contribuirà a valorizâ la sô vocazion pluriculturâl e la sô identitât plurilinguistiche. E je une ocasion uniche pe promozion e pal disvilup dal tiessût creatîf, pe valorizazion dal patrimoni storic, linguistic e culturâl, de competitivitât e de capacitât di atrazion di dut il teritori regjonâl. La nomine di Gurize e Nova Gorica a Capitâl de Culture e je un sucès straordenari: la vitorie de anime plui autentiche de Europe, chê de pluralitât dai popui e des lenghis, e dulà che ogni dì la int e fevele par furlan, par talian e par sloven. In dì di vuê, Gurize e forme cun Nova Gorica une aree urbane integrade ancje a nivel aministratîf; sedi pe sô posizion che pe sô storie, la citât e je un dai ponts di contat tra lis culturis romanichis, slavis e gjermanichis. Esprim lis tôs opinions, in forme di conte, poesie, teme, flabe, filastrocje, ricercje, riflessions personâls, lavôr multimediâl, e v.i. Il bant al è regolât di chescj articui:


Art. 1) A puedin partecipâ ae assegnazion dai premis i arlêfs che tal an scolastic 2021/2022 a frecuentin
lis Scuelis primariis e lis Scuelis secondariis di prin grât de Regjon Friûl – Vignesie Julie; si pues partecipâ sedi in maniere individuâl che in grup.
Par partecipâ si à di mandâ une preiscrizion, dentri di sabide ai 9 di Avrîl dal 2022. Il document al à di jessi compilât daûr dal model in zonte, che si cjate ancje li de Segretarie de Associazion “PERCOTO CANTA” e sul sît internet www.percotocanta.it.
La organizazion e domande la preiscrizion par podê previodi il numar dai partecipants e duncje par preparâsi a valutâ miôr che si pues ducj i elaborâts.

Art. 2) I elaborâts a àn di rivâ in formât digjitâl cun letare racomandade o consegnâts a man a cheste direzion:
Associazion Culturâl Musicâl “PERCOTO CANTA”
vie Gurize, 17 – PERCÛT
33050 Pavie di Udin
o, in alternative, par pueste eletroniche ae direzion info@percotocanta.it dentri di

sabide ai 21 di Mai dal 2022 (al fâs fede il timbri dal ufici postâl o la date dal messaç di pueste eletroniche).
Ogni partecipant al varà di specificâ non e cognon, direzion di cjase, numar di telefon, direzion e-mail, e il non de scuele e de classe frecuentade. Si domande ancje non, cognon, direzion e numar di telefon dal insegnant o dai insegnants responsabii dal progjet.
Art. 3) I elaborâts a saran valutâts di une jurie di cualitât nomenade de Associazion “PERCOTO CANTA”, de Societât Filologjiche Furlane, de ARLeF – Agjenzie Regjonâl pe Lenghe Furlane, dal Ufici Scolastic Regjonâl F-VJ, e selezionade tra lis personalitâts plui impuartantis de culture furlane. Il judizi de jurie no si pues discuti.
Art. 4) La comission judicante e sielzarà i trê elaborâts miôr tra ducj chei rivâts.
Il prin classificât al ricevarà: une borse di studi di € 300,00 e une selezion di libris ufierts de Societât Filologjiche Furlane.
Il secont classificât al ricevarà: une borse di studi di € 200,00 e une selezion di libris ufierts de Societât Filologjiche Furlane.
Il tierç classificât al ricevarà: une borse di studi di € 100,00 e une selezion di libris ufierts de Societât Filologjiche Furlane.
I nons dai vincidôrs a saran publicâts sul sît internet www.percotocanta.it

di lunis ai 6 di Jugn dal 2022.
Cun di plui, a ducj i partecipants (o aes lôr scuelis) e sarà mandade une e-mail cul verbâl de comission judicante.
Art. 5) Se la disponibilitât economiche lu permetarà, ducj i elaborâts in concors, o une part di chescj, a saran publicâts intun e-book di pueste par cure de ARLeF – Agjenzie Regjonâl pe Lenghe Furlane, de Societât Filologjiche Furlane e de Associazion “PERCOTO CANTA”. I autôrs dai elaborâts vincidôrs si impegnin a jessi presints di persone, o a mandâ cualchidun che ju rapresenti, aes premiazions che si davuelzaran te Vile Frattina-Caiselli di Percût cualchi zornade prime de manifestazion “PERCOTO CANTA” (si comunicarà la date definitive tal moment de proclamazion dai vincidôrs).
Art. 6) Cui che al partecipe al concors al è obleât a rispietâ ad implen i articui che a regolin il concors stes. La Associazion culturâl musicâl “PERCOTO CANTA” e pues fâ cualchi piçule modificazion al regolament, ma cence tocjâ i concets di fonde. Chest bant si cjate ancje sul sît internet www.percotocanta.it
I dâts personâi furnîts dai partecipants al concors a saran cjapâts sù e tratâts dome pes finalitâts leadis al concors stes (Gdpr n. 101/18 dai 10 di Avost dal 2018, gnove informative su la privacy). Il titulâr dal tratament al è il President de Associazion culturâl musicâl “PERCOTO CANTA” cu la colaborazion dai conseîrs e dai socis de Associazion.
Par altris sclariments su chest bant si pues clamâ il siôr Nevio Lestuzzi al numar 348/2260818, intal dopomisdì.